Eskenak Gipuzkoan arte eszenikoetako inbertsioak bultzatzen dituzten pizgarri fiskal berriak ezagutaraziko ditu otsailaren 19an Agustinak Zentroan antolatutako topaketa batean.

05/02/25

Eskena, Euskadiko ekoizle eszenikoen elkarteak, Agustinak Zentroarekin batera, finantzaketa eredu berritzaile bat aurkezten du, kultur sektorearen bultzada eta Gipuzkoako enpresentzako errentagarritasun fiskalerako aukera uztartzen dituena. Zuzeneko ikuskizunen ekoizpena sustatzeko diseinatutako arau esparru horrek %20ko errentagarritasun finantzario fiskala eskaintzen du.

Ekitaldiaren helburua da zerga araudi berri hori ezagutaraztea, arte eszenikoen ekoizleen eta eskualdeko enpresen arteko topaketak erraztea, eta lurraldeko kultura eta ekonomia sarea indartuko duten lankidetzak sustatzea.

Horretarako, Bittori Zabala Fernández GFAko Zerga eta Finantza Politikako zuzendari nagusiak eta Rodrigo Llano-Ponte Babacek GFAko Arau Garapen eta Aholkularitza Juridikoko zerbitzuburuak hartuko dute parte.

Isaac Palencia Caballero GFAko Kultura eta Gazteria Sustapeneko zuzendari nagusia eta Aizpea Otaegi Mitxelena Oarsoaldea Garapen Agentziaren presidentea eta Errenteriako alkatea ere bertan izango dira.

Gipuzkoan eragina duen inbertsio eredua

Arte eszenikoetarako pizgarri fiskalen araubidea, Foru Ogasunen Sozietateen gaineko Zergaren araudian txertatua, Europako agintariek babesten dute. Sistema horrek aukera ematen die enpresa inbertitzaileei ekoizpen eszenikoei itzuli beharrik gabeko finantzaketa emateko, eta, trukean, Sozietateen gaineko Zergaren kuotan kenkari fiskalak aplikatzeko, emandako finantzaketa baino 1,2 aldiz handiagoa den zenbatekora arte.

Ekimena zerga karga handia duten eta tokiko kultur sorkuntza babestu nahi duten Gipuzkoako enpresei zuzenduta dago bereziki, eta, aldi berean, inbertsio estrategia dibertsifikatzen dute.

Konpromiso sozial eta kulturala

Ereduaren arabera, ekoizleek kenkaria sortu den zerga-ekitaldian lortutako etekinen % 50, gutxienez, hurrengo lau urteetan ekoizpen eta erakusketa eszenikoko jardueretara bideratu beharko dituzte, Gipuzkoako ekosistema kulturala indartuz eta sektorearentzat finantza egonkortasun jasangarria bermatuz.

Topaketa Agustinak Zentroan: sinergiak erraztuz

Agustinak Zentroak, Gipuzkoako kultura- eta sormen-industrien lehiakortasuna hobetzeko konpromisoa duenak, mota horretako ekitaldiak bultzatzen ditu, sinergiak sustatzeko eta lurraldeko kultura- eta enpresa-sarea indartzeko. Topaketa hori funtsezkoa izango da:

• Zerga-araudi berriaren funtzionamendua, Bizkaian eta Araban arrakastaz martxan dagoen pizgarria eta eskaintzen dituen onurak zehatz-mehatz azaltzea.

• Kultura- eta enpresa-eragileen arteko harreman zuzena erraztea, lankidetza-aukerak sortuz.

• Zuzeneko ikuskizunen ekoizpenaren eta emanaldien garapenean eta jasangarritasunean lagunduko duten finantzaketa-proiektuak bultzatzea.

Eskena: 30 urte arte eszenikoen zerbitzura

Hiru hamarkadako esperientziarekin, Eskenak Euskadiko ekoizle eszeniko nagusietako 25 ordezkatzen ditu, Gipuzkoan egoitza duten 10 barne. Denbora horretan, Eskena euskal kulturaren sektoreari mesede egiten dioten ekimenen buru izan da, Eusko Jaurlaritzako Kultura sailaren laguntzarekin eta zehazki kultura pizgarrien kasuan, Foru Aldundietako Ogasun eta Kultura Sailekin elkarlanean.

Etorkizun iraunkorra kulturarentzat Gipuzkoan

Eskena eta Agustinak Zentroaren arteko lankidetzak enpresak eta kultur eragileak batzen dituen eredu berritzaile bat sendotzea agintzen du, sektore eszeniko sendoago, dibertsifikatuago eta jasangarriago baten alde.

Izen-emateak: www.oarsoaldea.eus/pizgarri-fiskalak-enpresentzat

Kontaktua:
Eskena
amaia@eskena.org | 94 673 35 18 / 616 812 677
eskena.org