CULTSOS proiektuaren esparruan, eta REDELekin lankidetzan, GARAPENek webinar ziklo bat abiarazi du kultura- eta sormen-sektoreari zuzenduta. Ekimen honen helburua da sektoreko profesionalei aukera ematea proiektu inspiratzaileak ezagutzeko, lehiakortasuna hobetzeko ezagutzak jasotzea eta kultura- eta sormen-esparruak garapen ekonomiko eta sozialean duen eraginari balioa ematea.

CULTSOS: kultur sektorearen erronkei erantzuna

CULTSOS proiektuaren helburua kultura- eta sormen-sektorearen egungo erronkei heltzea da, hala nola atomizazioa, lankidetzarik eza, finantzaketa lortzeko zailtasuna eta funts publikoekiko mendekotasuna. Gainera, kultura-eragileen kudeaketa-gaitasunak eta antolaketa-egitura indartu nahi ditu, eta, aldi berean, digitalizazioa eta garapen iraunkorrarekin bat datozen narratiben sorkuntza sustatzen ditu.

Ziklo honetako lehen topaketan dantzaren eta arte eszenikoen arloko bi proiektu berritzailek hartuko dute parte:

DAB Dantza Konpainia, Oarsoaldea eskualdeko garapen agentziak bultzatutako ekimena, dantza garaikidea gaurkotasuneko arazo sozialei aurre egiteko tresna gisa erabiltzen duena. Bere lanek, publikoa entretenitzeaz gain, gogoetara eta elkarrizketara gonbidatzea ere bilatzen dute. Horretarako, konpainia ez da berez dantzara mugatzen, beste diziplina artistiko batzuetako elementuak barneratzen ditu, hala nola musika, antzerkia eta arte bisualak, transmititu nahi den mezua aberasten duten esperientzia multidimentsionalak sortuz.

Lo Que El Silencio Escucha, IMPULSALICANTEk, ekonomia eta gizarte garapenerako tokiko agentzia bultzatzaileak sustatutako proiektua. Alba Bonetek sortua, diziplina anitzeko ekimen honek aniztasun funtzionala ikusaraztea du helburu, bereziki entzumen-zailtasunak dituzten pertsonei. Literaturaren, antzerkiaren, zinemaren, collagearen eta podcasten bidez, artea aldaketa sozial eta pertsonalerako tresna gisa erabiltzen du, isiltasunak eta soinuak hizkuntza propioa bereganatzen duten soinu-unibertso paregabea esploratuz

Lankidetzaren eta berrikuntzaren aldeko apustua

Topaketa horien bidez, GARAPENek eta bere laguntzaileek sinergiak sortu nahi dituzte sektoreko profesionalen artean, ezagutzak partekatu eta ekosistema kultural indartsuagoa, iraunkorragoa eta lehiakorragoa sustatuz.

Interesatzen zaizu?

Sektoreko enpresa bazara eta parte hartzea interesatzen bazaizu, bete honako galdetegia.