Sari-emate festa arratsaldeko 18:00etan hasi zen eskualdeko lau herrietako Kuadrillategiko gazteak Errenteriako Biteriko plaza estalira iritsi zirenean. Iritsi bezain pronto jolastokia apaindu zuten eurek egindako muralekin eta kartelekin.

Segidan sari-emate ekitaldia egin zen, herrietako irabazleetatik hasiz. Errenteriako esketxik onena “Ivanblue” izan zen, Lezokoa “Frozen abestis“, Oiartzungoa “Zer gertatzen da?“ eta Pasaiakoa “Eminiminiren arratsaldeak“. Horren ondotik, sari nagusiak banatu ziren. Hala, bigarren saria, internauten bozkek erabakitakoa, “Oihan Mega“ esketxarentzat izan zen eta epaimahaiak emandako sari nagusia, berriz, “Libre“ izeneko esketxarentzat. 

Pozik hartu zituzten sariak gazteek. Buruntzaldeko esketx irabazlea eta bigarren saria jaso duena ere ikusi zituzten besteekin batera ekitaldian jarritako pantaila erraldoian.

Sariak banatu eta esketxak ikusi ostean, txokolate-jatea egin zuten bildutako guztiek. Azkenik, gaueko 21:00ak aldera arte luzatu zen festa Gantxegi DJarekin.

Jexux Leonetek, Oarsoaldea Garapen Agentziaren lehendakariak eta Oiartzungo alkateak adierazi duenez, hirugarren urtez antolatu da Motxian Eby Esketx Lehiaketa gazteen artean euskararen erabilera sustatzeko xedez. Aurten guztira 44 esketx aurkeztu dira eta esketxak ikusgai dituzue www.motxianeby.eus gunean.

Ikusi sari banaketako argazkiak.

Ikusi sari banaketako laburpen bideoa.